
第一世噶玛巴教言集1KM13བདེ་མཆོག་གི་གཏོར་མའི་ཆོ་ག་བཞུགས་སོ། །
1-2-151a
༄༅། །བདེ་མཆོག་གི་གཏོར་མའི་ཆོ་ག་བཞུགས་སོ། །
༄༅། །བདེ་མཆོག་གི་གཏོར་མའི་ཆོ་ག་བཞུགས་སོ། །གུ་རུ་ན་མོ། དང་པོར་བྱང་ཆུབ་ཏུ་སེམས་བསྐྱེད་ལ་རང་ཉིད་སྐད་ཅིག་གིས་ཡི་དམ་དུ་བསྐྱེད། གཏོར་མ་མི་དམིགས་པའི་ངང་ལས། ཡཾ་ལས་རླུང་གི་དཀྱིལ་འཁོར་གཞུ་ལྟ་བུ། དེའི་སྟེང་དུ་རཾ་ལས་མེའི་དཀྱིལ་འཁོར། དེའི་སྟེང་དུ་ཀཾ་གསུམ་གྱུར་པ་ལས། མི་མགོ་རློན་པ་གསུམ་སྒྱེད་པུའི་ཚུལ་དུ་བསམ། དེའི་སྟེང་དུ་ཨ་ལས་ཐོད་པ་བསམ། དེའི་དབུས་སུ་བི་ལས་དྲི་ཆེན༑ ཤར་དུ་མུ་ལས་དྲི་ཆུ། ལྷོར་ར་ལས་རཀྟ། ནུབ་ཏུ་ཤུ་ལས་བྱང་ཆུབ་ཀྱི་སེམས། བྱང་དུ་མ་ལས་གླད་པ། ཤར་ལྷོར་གོ་ལས་བ་ལང་གི་ཤ །ལྷོ་ནུབ་ཏུ་ཀུ་ལས་ཁྱིའི་ཤ །ནུབ་བྱང་དུ་དྷ་ལས་རྟའི་ཤ །བྱང་ཤར་དུ་ཧ་ལས་གླང་པོ་ཆེའི་ཤ །དབུས་སུ་ན་ལས་མིའི་ཤ །དེ་ནས་ཐོད་པའི་དབུས་ཀྱི་ནམ་མཁའ་ལ་ཨོཾ། དེའི་སྟེང་དུ་ཨཱཿ དེའི་སྟེང་དུ་ཧཱུྃ་བསམ། ཧཱུྃ་ཞེས་བརྗོད་པས། རླུང་གི་མེ་སྦར། མེས་ཐོད་པ་དྲོས་པ་ལས་ནང་གི་རྫས་ཁོལ་བར་བསམ། དེ་ནས་ཨོཾ་ལྷུང་བས་བདུད་རྩིའི་རྒྱ་མཚོ་ཆེན་པོར་བསམ། ཨཱཿ ལྷུང་བས་ཟག་མེད་ཀྱི་བདུད་རྩིར་བསམ། ཧཱུྃ་གྱུར་པ་ལས་རྡོ་རྗེ་ཧཱུྃ་གིས་མཚན་པ་གཅིག་བསམ། དེ་ལས་འོད་ཟེར་འཕྲོས་ཏེ། དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་སྤྱན་དྲངས་ཏེ། རྡོ་རྗེའི་སྦུ་གུར་ཐིམ། རྡོ་རྗེས་དཀྲུགས་པས་རྡོ་རྗེ་ཡང་ཞུ་བར་བསྒོམ། དེ་ནས་ཡང་། ཨོཾ་ཨཱ༔ཧཱུྃ་ཉི་ཤུ་
1-2-151b
རྩ་གཅིག་བརྗོད་ལ། ཟག་མེད་ཀྱི་བདུད་རྩི་ཆེན་པོར་བསམས་ཏེ་བྱིན་གྱིས་བརླབ་བོ། །དེ་ནས་མཛུབ་མོ་མདུད་བྱ་ཞེས་བྱ་བའི་ཕྱག་རྒྱས། ཨེ་ཨ་ར་ལླི་ཧོ༔ ཛཿཧཱུྃ་བཾ་ཧོཿ བཛྲ་ཌཱ་ཀི་ནི། ས་མ་ཡ་ཧོཿ ས་མ་ཡ་སྟྭཾ༑ དྲྀ་ཤྱ་ཧོཿ ཨོཾ་ཨཱཿཧཱུྃ། ཞེས་པའི་སྔགས་ལན་གསུམ་མམ་ལྔའི་བར་དུ་བརྗོད་པས། མགྲོན་ཐམས་ཅད་སྤྱན་དྲངས་ལ། དེ་ནས་སྐད་ཅིག་ལས་སྙིང་གའི་ཧཱུྃ་ལས་འོད་ཟེར་འཕྲོས་ཏེ། བདེ་མཆོག་ལྷ་ལྔའི་དཀྱིལ་འཁོར་དུ་གྱུར་པར་བསམ། ས་བླ་ས་འོག་ས་སྟེང་གི་སྐྱེ་འགྲོ་ཐམས་ཅད་ཀྱང་བདེ་མཆོག་དུ་གྱུར་ནས། དེ་རྣམས་ཀྱི་ལྕེ་ཧཱུྃ་ལས་རྡོ་རྗེ་སྦུ་གུ་ཅན་དུ་གྱུར། གཏོར་མ་ཐམས་ཅད་འཐུང་བར་བསམ་ལ། རྡོ་རྗེ་ཐལ་མོ་ཁ་ཕྱེ་བའི་ཕྱག་རྒྱ་བཅིངས་ལ་འབུལ་བ་ནི། ཨོཾ་ཧྲི་ཧ་ཧ་ཧཱུྃ་ཧཱུྃ་ཕཊ། ཨོཾ་ཁ་ཁ་ཁཱ་ཧི་ཁཱ་ཧི་སརྦ་ཡཀྵ། རཀྵ་ས། བྷཱུ་ཏ། པྲེ་ཏ། པི་ཤཱ་ཙ། ཨུཥྨ་ར། ཨ་པ་སྨ་ར། ཌཱ་ཀ་ཌཱ་ཀི་ནྱཱ་ད་ཡ། ཨི་དམ་བ་ལིཾ། གྲྀ་ཧནྟུ། ས་མ་ཡ་རཀྵནྟུ། མཱ་མ་སརྦ་སིདྡྷི་མྨེ་པྲ་ཡཙྪནྟུ། ཡ་ཐཻ་བཾ། ཡ་ཐཻཥྚཾ། བྷུཉྫ་ཐཱ། པཱི་ཝ་ཐཱ། ཛཱིཾ་གྷྲ་ཐཱ། མ་ཏི་ཀྲ་མ་ཐཱ། མ་མ་སརྦ་ཀརྠཱ་ཡ་སད་སུ་ཁཾ་བི་ཤུདྡྷེ་ས་ཧ་ཡི་ཀཱ་བྷ་ཝནྟུ་ཧཱུྃ་ཧཱུྃ་ཕཊ། ཞེས་པའི་སྔགས་ཀྱིས་བཏབ་པར་བྱའོ། །དེ་ནས་བསྟོད་པ་བྱ་བ་ནི། ཡེ་ཤེས་སྟོང་པ་བདེ་བའི་འཁོར་ལོ་ནི། །བདེ་བ་ཆེན་པོ་ཡང་དག་རོལ་པ་ཡིས། །ཡང་དག་ཏིང་འཛིན་ཡང་དག་ལྡན། །དཔལ་ལྡན་སྡོམ་ལ་བདག་ཕྱག་འཚལ། །མགོན་
1-2-152a
༄༅། །པོ་ལ་ནི་ཡང་དག་འཁྱུད། །ཞལ་གཅིག་ཁ་དོག་ཆེར་ལྡན་པ། །བདེ་བའི་རང་བཞིན་ཐོད་ཁྲག་འཛིན། །རྡོ་རྗེ་ཕག་མོ་བདག་ཕྱག་འཚལ། །ཉི་མའི་དཀྱིལ་འཁོར་སྟེང་ན་གནས། །ཕྱག་རྒྱ་ལྔས་ནི་ལེགས་པར་བརྒྱན། །བཅོམ་ལྡན་འདས་ཞལ་དང་འདྲ་བ། །མཁའ་འགྲོ་ལ་སོགས་བདག་ཕྱག་འཚལ། །ཉི་མའི་དཀྱིལ་འཁོར་སྟེང་ན་གནས། །གཡོན་པ་ལ་སོགས་རོ་སྟེང་གནས། །གྲི་གུག་དང་ནི་ཐོད་ཁྲག་འཛིན༑ ༑ཕྱག་རྒྱ་ལྔས་ནི་རྣམ་པར་སྦྱོར། །སྤྱན་གསུམ་ལྷན་ཅིག་སྐྱེས་པ་ཡི། །ཡང་དག་བདེ་བའི་ཐུགས་ལྡན་པའི། །དཀར་དམར་ནག་མོ་མཁའ་འགྲོའི་ཚོགས། །སྐུ་གསུང་ཐུགས་ལ་ཕྱག་འཚལ་ལོ། །ཡང་དག་ལས་ལ་འཚོ་བ་དང་། །ཡང་དག་རྩོལ་བ་ཡང་དག་དྲན། །སྒོ་སྐྱོང་བ་ནི་བཞི་པོ་ལ། །ཞབས་ཏོག་ཕྱིར་ན་ཕྱག་འཚལ་བསྟོད། །པདྨ་ཉི་མ་རོ་སྟེང་གནས། །ཡིད་འཕྲོག་མཛེས་པའི་གཟུགས་གཉིས་འཛིན། །ཡང་དག་སྤོང་བའི་ངོ་བོ་ཉིད། །མཚམས་མ་བཞི་ལ་བདག་ཕྱག་འཚལ། །ཞེས་བརྗོད་དོ། །བཟོད་པར་གསོལ་བ་ནི། བདག་བློ་འཁྲུལ་པས་ཏིང་འཛིན་ཆོ་ག་ལས་ཉམས་དང་། །མཆོད་དང་གཏོར་མ་དམན་ཞིང་སྔགས་དང་ཕྱག་རྒྱ་འཁྲུལ་པ་དང་། །བརྩོན་པ་དམན་ཞིང་སེམས་ནི་དངོས་པོ་མ་ལགས་གང་སྐྱེས་པ། །ཐམས་ཅད་མཁྱེན་གྱིས་བཟོད་པར་བྱིན་གྱིས་བརླབ་ཏུ་གསོལ། །བསྔོ་བ་ནི། མི་མཆོག་གང་ཞིག་
1-2-152b
ཀུན་སྤྱོད་པ། །སྡིག་པ་ཐམས་ཅད་རྣམ་དག་བདག །དེ་བཞིན་གཤེགས་པའི་ས་ཐོབ་ཅིང་། །རིགས་སྐྱེས་ཆོས་ལྡན་རྒྱལ་པོར་འགྱུར། །ཇི་ལྟར་བསགས་པའི་སྡིག་པ་སྤངས། །བག་ཆགས་ཀུན་ཟད་མཚན་མ་ཡིན༑ ༑གང་ཚེ་འདི་ནི་རྟག་བསྒོམས་པས། །དཔའ་བོ་འདོད་པའི་དབང་ཕྱུག་ཤོག །དེ་ནས་ཡི་གེ་བརྒྱ་པ་བཟླས་སོ། །སྨོན་ལམ་ནི། བདག་གི་དུས་གསུམ་དགེ་བ་ཡིས། །རྒྱལ་བ་མཆོད་པས་མཉེས་གྱུར་ཅིག །དམ་ཆོས་སྲུང་མ་བསྐོང་གྱུར་ཅིག །ཕ་མ་ལ་སོགས་འགྲོ་དྲུག་རྣམས། །ཚད་མེད་གཏོར་མ་འདི་བཞེས་ལ། །བཅོམ་ལྡན་གོ་འཕང་ཐོབ་པར་ཤོག །ཧེ་རུ་ཀའི་གཏོར་མའི་ཆོ་ག་རྫོགས་སོ།། །།


目录
བདེ་མཆོག་གི་གཏོར་མའི་ཆོ་ག་བཞུགས་སོ། །